Aro l’estièu es bèn acaba ! Aquest’annado avèn pas agu fouorço encèndi prés de Grasso. Li avié lei poumpié en alerto, lei harkis fourestié e lei Coumitat Comunau Fiò de Fourest (CCFF) qu’asseguravon la survihanço.
Ami moun bèu pais grassenc ! E afin d’estre utile, m'es souvènt arriba, pèr lou Coumitat Comunau Fiò de Fourest, qu’èri membre, d'efetua uno survihanço dei bouosc en previsioun dei fiò que ravajon cade estièu, nouastro bello regioun.
M'agradavi fouorço de m'istala sus lei colo grassenco, e mai particulieramen ei "roure de l’emperaire" subre la routo "Napoléon"( chêne de l'Empereur), douminèn la mar, la plano, dóu Cap d'Antibo enjusqu'a Freju.
Quouro li avié pas de fum souspèto, amiravi lei resplendour dóu païsage.
De cop li'avié uno touristo esbalausi pèr l'espectacle magnifi que me fasié de questioun.... e de li, e de la..... Tau aquéu Anglès, quau, un jou, me demandè : "...quentei soun leis isclo que vesèn, proche dóu ribeirés...." Emé soun det, me moustravo leis Isclo de Lerins : Santo Margarido e Sant Ounoura.
Emé moun sèns de la galejado, ai respoundu (tambèn pèr me garça un pau d’éu) : "...Soun la Corso e la Sardegno !.." (aquelo aneidoto es autentico !)
L' anglès, ravi d’agué pouscu veire aquesteis « isclo luenchenco », a fach fouorço foutografi puei es parti tout countènt !...
Imagini ancaro l’ome, en trin de racounta a seis ami, qu'avié vist, la causo es raro un jour sènso Mistrau, emé un pau de brumo subre la mar, aqueleis isclo de nouastro Mediterragno. « Sant Ounoura e Santo Margarido, perdounès-mi !…

Alan SALVAT