La modo es de parla dei lengo minouritari e particulieramen de la lengo prouvençalo emé lei diferènt biais de parla – roudanen, maritime… o grassenc, que pèr fouorço gèns es uno sorto de mesclun (pas un patouès), de gavouot, de maritime e de nissard : aquèu s’esplico pèr la pousicioun geografico de Grasso à la crousiero dei camin deis Aups à la mar, sus la routo dòu Var à Niço.
Li a dei gèns que s’inquiéton de la lengo d’O, (faudrié créire que li a uno solo lengo dins lou Miéjour,) que farié de l’oumbro au nouostre prouvençau…
Pèr simplifica à l’estrèmo – e iéu, insisti bèn, pèr simplifica ! fai pas de poulemico – diriéu que lei oucitaniste an milita despuéi mai de cent an pèr qu’uno idéio, un councèt de lengo unico dòu Miéjour, devingue uno realita poulitico. A passa tèms quouro li avié pas gaire de méjan de trasport, lei gèns parlavon soun patoués, sa lengo qu’ero lou biais d’esprima soun besoun pèr vièure e qu’ero pas la lengo d’O, mai uno dei lengo d’O. Nouastrei reire s’en garçavon bèn dòu restant. Encuei, parlèn francès en Franço e li a pas d’interès de parla la lengo d’O (mai laquello ?). N’i a proun de parla francès pèr estre coumprés. L’interès es de renousa emé sei racino pèr lou biais de la lengo, de retrouba lei mot de sei reire e de se souveni que sian prouvençau de Prouvènço ; que la Prouvènço es la mita geografico de l’oucitanio, que la majo part de nouastrei vésin d’Auvergno, de Limousin, de Béarn, de Catalougno e patin coufin se garçon fouorço coume nautre de tout’ aquélei flouriduro inventado pèr faire « caga lou mounde ». Nouastro lengo es pas pèr estre parla dins lei saloun, mai un biais de s’esprima au siéu, emé sa famiho, seis ami, sei vesin pèr la culturo, la remenbranço, un patrimoni que fan qu’un pople es uni e fort. Iéu, siéu fier de parla coume aco et d’escriéure la grafio de Fréderi Mistral ; Felibre, grassenc vous counvidi à parla la lengo sènso vergougno, e de l’escrièure, mai tambèn, d’ana véire lou trabai dei autre associacioun, de vous faire marca eis escolo felibrenco pèr charra dòu pais e perpetua sei coustumo…Estre Felibre es pas de pourta l’espingouleto de la pervenco, es un biais de viéure. Me souveni d’un 9 de avoust de 2001, li avié dins la salo souto lou Cous uno mostro sus Prouvenço e sei tradicioun, pèr leis soucieta de tradicioun « Cap sur la vie » - « Lei Bajanet de Pue-Meinado » -« les Amis des Oratoires » - « l’Escolo dòu Jaussemin » e la chourmo fouclorico « l’Académi dòu Jaussemin ». Fin finalo, avèn ausi lou cantaire Jan-Marìo Loubet e la couralo de « Cap sur la vie ». Es bèn doumaje que n’avèn pas vist de noutable prouvençau, Moussu lou conse a fach escuso, avèn bèn coumprés e le gramacian… Lou meme jou li avié lei « serado de la terrasso » au Casino : li avié bèn de gèns, bessai qu’ero pèr aco que souto lou Cous n’avèn pas vist fouorço mounde… Faudra pas dire que rèn se fa à Grasso, venes véire quouro li a uno manifestacioun e béure emé nautre à l’amista. Sares perdouna se venes lou còp venènt.
Felibre, pourtas bèn aut vouastro fierta de prouvençau, vous faudra leva la vesto pèr-fin que Prouvènço perduro !

Alan Salvat